4/12/2017

Sundhöll Reykjavíkur opnuð á ný

Ný viðbygging og útilaugasvæði var opnuð við Sundhöll Reykjavíkur í gær. Verkís annaðist alla verkfræðihönnun í verkinu. 

Sundhöll Reykjavíkur v/Barónsstíg er ein af þekktari byggingum landsins og um leið sú bygging sem margir telja eina þá bestu frá hendi Guðjóns Samúelssonar, arkitekts og húsameistara ríkisins. 

Viðbyggingin er tveggja hæða frambygging við Barónsstíg og lágbygging sem liggur hornrétt frá henni meðfram lóðarmörkum til suðurs. Neðri hæð frambyggingar er niðurgrafin að Barónsstíg.

Aðalinngangur er næst tengibyggingu. Frambygging og lágbygging meðfram suðurlóðarmörkum mynda ásamt eldri byggingu og veggjum skjólgott laugasvæði mót suðri. Heildarflatarmál byggingarinnar eru.þ.b. 1.000 m². Lagnakjallari er auk þess um 350 m². Laugarsvæði er um 682 m². Stærð lóðar er um 3.484 m². Á laugarsvæði er 25 metra útilaug með fjórum brautum auk eimbaðs, tveggja heitra potta, eins nuddpotts og vaðlaugar.

Viðbyggingin við Sundhöll Reykjavíkur v/Barónsstíg verður fyrsta verkefnið hjá Reykjavíkurborg sem verður vottuð af BREEAM og er stefnt að einkunninni Very Good.

Verkís sá um eftirtalda hönnun í verkinu:

  • Öll burðarvirki auk grundunar
  • Öll lagnakerfi byggingarinnar s.s. fráveitu- og drenlagnir, vatns-, hita-, og snjóbræðslukerfi auk fráveitulagar fyrir lóð Sundhallarinnar
  • Öll sundlaugarkerfi viðbyggingar og samþættingu fyrir sundlaugarkerfi Sundhallarinnar
  • Loftræsikerfi byggingar
  • Öll raforkuvirki byggingarinnar þ.m.t. lýsingu innan húss sem utan Sundhallarinnar ásamt hönnun á öllum sérkerfum
  • Úttektir og ástandsskoðun á Sundhöllinni
  • Gerð verkteikninga, verklýsingar, magnskrár og kostnaðaráætlana


Auk þess hefur Verkís séð um eftirfarandi þætti:

  • Verkís hefur séð um alla ráðgjöf varðandi umhverfisvottunina, þ.m.t. úttektir matsmanns, efnisval og aðra vinnu vegna BREEAM.
  • Verkís sá einnig um vinnu vegna BREEAM á framkvæmdatíma, úttektum og gagnasöfnun (Post Construction). Þá hefur Verkís unnið að skipulagi viðtökuprófana, úttektum vegna viðtökuprófana, (Commissioning), gagnasöfnun og skýrslugerð fyrir Breeam.  
  • Einnig sá Verkið um ráðgjöf vegna viðbyggingar varðandi hönnun, útboð og eftirlit vegna samþættingu sérkerfa milli nýja og gamla hússins. Þau sérkerfi sem um er að ræða eru: innbrotakerfi, kallkerfi (hátalarakerfi), neyðarhnappakerfi, myndavélakerfi og stjórnkerfi. Einnig vann Verkís ráðgjöf vegna viðbyggingar varðandi tækilegt eftirlits og efnissamþykkta á flóknum tæknibúnaði sundlaugarkerfa og undirkerfa sem mynda sundlaugarkerfið í heild sinni. 


Verkís óskar Reykjavíkurborg til hamingju með nýju viðbygginguna.

Ljósmynd/VA arkitektar

Frétt RÚV um opnunina