17/11/2017

Gangsetning fyrri áfanga Þeistareykjavirkjunar

Þeistareykjavirkjun er 90 MW gufuaflsvirkjun sem byggð er í tveimur 45 MW áföngum. Formleg gangsetning fyrri áfangans fer fram í dag en til stendur að ræsa þann síðari vorið 2018.

Fullnaðarhönnun Þeistareykjavirkjunar og gerð útboðsgagna hófst í lok árs 2011. Verkís og Mannvit eru aðalráðgjafar Landsvirkjunar í þessu verki, ásamt TARK og Landslag. Hönnun virkjunarinnar tók mið af hagkvæmni, góðri nýtingu auðlindarinnar og samspil við umhverfið á Þeistareykjum. 

Ráðgjafahópur Verkís og Mannvits annaðist meðal annars allan vélbúnað, rafbúnað og stjórnbúnað, sem og gufuveitu, stöðvarhús og önnur mannvirki. Ráðgjafahópurinn kom einnig að þeim hluta framkvæmdaeftirlits sem sneri að vél-, raf- og stjórnbúnaði auk landmótunar, sem og aðstoð við prófanir og gangsetningu.  

Framkvæmdir hófust í apríl 2015 og kom fjöldi verktaka og vélbúnaðarframleiðanda þar að. Helsta má þar nefna LNS Saga (nú Munck) sem var aðalverktaki við reisingu stöðvarhúss og lagningu gufuveitu og Fuji sem útvegaði túrbínur virkjunarinnar og kæliturna.

Verkís óskar Landsvirkjun til hamingju með áfangann og þakkar ennfremur fyrir gott samstarf á undirbúningstíma virkjunarinnar.

Ljósmynd/Mannvit