14/8/2015

Fráveitu­framkvæmdir á Vesturlandi

  • OR fráveita

Á árunum 2006-2008 vann Almenna verkfræðistofan (nú Verkís) að hönnun fráveitukerfis OR á Akranesi, Borgarnesi og Kjalarnesi. Um var að ræða þrjá verkhluta:

  • Hreinsistöðvar, dælustöðvar og safnræsi
  • Dælu- og hreinsibúnaður
  • Sjólagnir

Verkframkvæmdir voru boðnar út á árunum 2007 og 2008 og hófust í kjölfarið. Þeim var hins-vegar ekki að fullu lokið þegar þær voru settar á bið í lok árs 2010 í kjölfar endurskipulagningar á rekstri OR.

Staða verksins var því þannig að lokið var við að byggja hreinsistöðva byggingarnar, leggja nær öll safnræsi, byggja dælustöðvar og dælubrunna, en hreinsibúnaður var eingöngu kominn inn í stöðvarnar, en óuppsettur.  Vinna við sjólagnir þ.e. útræsi frá hreinsistöðvunum ásamt yfirfalls-útræsum var einnig eftir.

Vinna við sjólagnir hófst nú á vormánuðum og stendur enn yfir.  Verktakafyrirtækið Ístak vinnur að þeim verkframkvæmdum.  Nú þegar hafa sjólagnir verið settar niður á Kjalarnesi, en eftir er vinna í lokafrágangi.  Þá er nú í gangi vinna við sjólagnir á Akranesi, og hefur m.a. verið unnið í sumar að því að byggja þrýstibrunn í fjöruborðinu skammt frá hreinsistöðinni.  Vinna við sjólagnir í Borgarnesi er ekki hafin, en mun hefjast næsta vor.

Sjólögnin á Akranesi er um einn og hálfur kílómeter að lengd, úr plasti með þvermál 630 mm. Endi lagnarinnar verður á um 18-19 metra dýpi. Næst landi er lögnin grafin í sjávarbotninn, en utar liggur hún á botninum og er að hluta til fest í botninn vegna straumáhrifa.

Sjólögnin á Kjalarnesi er ríflega einn kílómeter að lengd, með þvermál 280 mm.  Endi lagnarinnar fer á um 13-14 metra dýpi.  Sjólagnir í Borgarnesi eru annarsvegar 500mm þrýstilögn frá Bjarnabraut yfir í Brákarey og hinsvegar 450mm aðalútræsislögn sem nær um 800m út í Borgarfjörðinn.  Lögnin verður grafin að mestu í sandeyrar en endi lagnarinnar verður á um 5-6 metra dýpi.

Á árinu 2016 verður einnig unnið að uppsetningu vélbúnaðar í öllum umræddum hreinsistöðvum.

Áætlað er að hið nýja frárennsliskerfi Orkuveitunnar bæði á Akranesi, í Borgarnesi og á Kjalarnesi verði tilbúið í árslok 2016, og verði þá gangsett.

Nánar er fjallað um þetta verkefni í Skessuhorni sem kom út miðvikudaginn 12. ágúst.
Sækja pdf.