Menntastofnanir

Leikskóli - Bláskógarbyggð

Verkís sér um verkfræðihönnun og ráðgjöf vegna verkfræðiþátta. 

Stærðir: 1.500 m2
Verktími: 2018 - 

Almennt um verkefnið: 
Leikskólinn verður staðsettur í Reykholti í Biskupstungum við hlið íþróttamiðstöðvar, sundlaugar og grunnskólans á svæðinu. Leikskólinn verður grundaður á fyllingu og samanstendur burðarvirki byggingarinnar af steyptum sökklum og steyptum út- og innveggjum, en þakvirkið verður gert úr stálbitum og léttu timburvirki. Byggingin verður upphituð með gólfgeisla og verða öll rými loftræst með vélrænni loftræsingu. 

Sérstakt tillit verður tekið til hljóðvistar og er sérvalin innanhúsklæðning á veggjum og hljóðdúkur í lofti sem tryggir bæði góða hljóðvist og uppfyllir skilyrði brunahönnunar. Byggingin verður klædd að utan með bárujárni á bæði veggjum og þaki, en innskot verða klædd með timbri.

Við hönnun á byggingunni hefur bæði verkkaupa og meðhönnuðum gefist kostur á því að kynna sér mannvirkið í sýndarveruleika (VR) í höfuðstöðvum Verkís í Ofanleiti í Reykjavík. Hefur það gefið góða raun og nýst vel við að yfirfara útlit og hönnun.

Byggingin skiptist í þrjár deildir, 1-2 ára deild, 2-3 ára deild og 4-5 ára deild. Á milli deilda eru tvö hóprými og hvíldarherbergi. Þá er stórt fatahengi í anddyri og matsalur fyrir starfsfólk og nemendur. 

Í byggingunni verða einnig kaffistofa og vinnuherbergi kennara, sérkennslurými, listasmiðja, myrkvaherbergi, aðstaða leikskólastjóra ásamt ýmsum tæknirýmum. Lóð leikskólans er um 1.500 m² að stærð og verður henni skipt upp í leiksvæði fyrir yngri deildir og leiksvæði fyrir eldri deildir. Á lóð verður einnig leiktækjageymsla og geymsla fyrir barnavagna.