Með sjálfbærni að leiðarljósi

Hlutverk Verkís er að skapa verðmæti og styðja þróun samfélagsins og innviða þess með faglegri ráðgjöf og hönnun. Verkís er með skýra framtíðarsýn og hefur sett sér stefnumið með áherslu á viðskiptavini, starfsfólk og samfélagið. Áherslur í starfseminni eru settar fram í sjálfbærni-, þjónustu- og mannauðsstefnum sem jafnframt styðja vel við heimsmarkmið Sameinuðu þjóðanna og UN Global Compact.

Verkís leggur mikinn metnað í að allir geti notið góðs af starfsemi fyrirtækisins. Við hvetjum til ábyrgðar í störfum okkar, horfum til framtíðar með sjálfbærni að leiðarljósi, og höfum þannig jákvæð áhrif á samfélagið og umhverfi okkar. Starfsfólk Verkís leggur sig fram við að leita lausna og veita þjónustu sem samræmist meginviðmiðum um sjálfbæra þróun.

Helstu niðurstöður sjálfbærniskýrslu 2024

Kolefnisspor Verkís árið 2024 var 398 tonn CO₂-ígildi. Heildarlosun GHL á hvern starfsmann var því 1,1 tonn CO₂-ígildi. Dróst kolefnissporið saman um 23% frá fyrra ári. Kolefnisspor fyrirtækisins felst bæði í beinni og óbeinni losun GHL sem tengjast rekstri Verkís. Bein losun er sú losun GHL sem fyrirtæki veldur beint, vegna bruna jarðefnaeldsneytis í eigin bifreiðum. Óbein losun er losun frá keyptri orku, losun í aðfangakeðju og notkun vöru, en sú losun er stærsti hluti kolefnissporsins.

Helstu niðurstöður sjálfbærniskýrslu 2024

Stærstu losunarþættir fyrirtækisins ársins 2024 falla undir umfang 3, alls um 81% af heildarlosun. Þar vega þyngst vinnuferðir starfsfólks og ferðir til og frá vinnu, sem samanlagt mynda 60% af heildarlosun. Ferðaumsvif vegna verkefna árið 2024 hafa aukist frá árinu áður og greinilegt er að starfsfólk sækir meira í að mæta í vinnuna árið 2024 í stað þess að vinna að heiman.

Losun gróðurhúsalofttegunda í umfangi 1 felur í sér beina losun frá fyrirtækinu. Er það sú losun sem á sér stað við notkun jarðefnaeldsneytis á farartækjum í rekstri Verkís, og jókst sú losun töluvert milli ára og er nú um 15% af losun Verkís. Í umfang 2, sem stendur aðeins undir um 3% af kolefnisspori fyrirtækisins, er óbein losun sem kemur til vegna rafmagns- og hita notkunar fyrirtækisins.

Sjálfbærni

Sjálfbærniskýrsla Verkís hefur verið gefin út frá árinu 2015. Skýrslan er ætluð að varpa ljósi á hvernig Verkís hefur tekist að innleiða sjálfbærniviðmið, bæði í rekstri stofunnar og þeirri þjónustu sem við veitum, sem og að uppfylla þau markmið sem við settum okkur um sjálfbærni á árinu. Skýrslan byggir á UFS leiðbeiningum Nasdaq (Umhverfi, Félagslegir þættir og Stjórnarhættir). 

Árið 2024 einkenndist af krefjandi og fjölbreyttum verkefnum þar sem reynsla og sérfræðiþekking Verkís naut sín – ekki síst í tengslum við hraunvarnir á Reykjanesi. Verkís hélt áfram að vera í fararbroddi sjálfbærrar þróunar, með áherslu á orkuskipti, kolefnisjöfnun og þekkingarmiðlun. Þátttaka í COP29 undirstrikaði alþjóðlega ábyrgð okkar og metnað til að hafa áhrif til framtíðar. Skýrslan dregur fram árangur og tækifæri, og markar skref í átt að kolefnishlutleysi 2030.

Ábyrgð í verki

Við leggjum ríka áherslu á að sinna okkar samfélagslegu skyldum sem leiðandi fyrirtæki í okkar geira. Því höfum við markað okkur skýra stefnu í loftslagsmálum til að leggja okkar lóð á vogarskálar heimsins.

Árið 2015 skrifaði Verkís undir yfirlýsingu, í samvinnu við Festu, um að draga úr losun gróðurhúsalofttegunda. Verkís setti sér það loftlagsmarkmið að stefna að því að verða kolefnishlutlaust árið 2030, mæla árangurinn og gefa reglulega út upplýsingar um stöðu þess.