Fréttir: 2020

Frá og með næsta mánudegi, 13. júlí til föstudagsins 31. júlí, verður opnunartími móttöku O2 með breyttu sniði.

Verkís hlaut nýverið styrk úr Rannsóknarsjóði Vegagerðarinnar vegna sigmælinga með LiDAR á þyrildi. Tilgangurinn er að skoða hvort hægt sé að nota búnaðinn til að meta sig á framkvæmdasvæðum í stað þeirra aðferða sem nú eru notaðar, eða sem stuðningur við núverandi aðferðir.

Í síðustu viku var tekin í notkun ný flokkunarlína í móttökustöð SORPU í Gufunesi. Með því hófst prófunarferli á flokkun úrgangs frá heimilum. Þetta er veigamikið skref í aðdraganda þess að hafin verði tilraunavinnsla í nýrri gas- og jarðgerðarstöð (GAJA) í Álfsnesi sem var formlega opnuð 18. júní sl. Verkís hefur sinnt framkvæmdaeftirliti við byggingu stöðvarinnar.

Verkís mun sjá um óháða rýni á hönnun og framkvæmdum vegna Fornebubanen, stærsta neðanjarðarlestarverkefnis í Noregi í seinni tíð. Verkefnið er mjög umfangsmikið og er heildar kostnaður við verkefnið rúmlega 16 milljarðar norskra króna, eða um 225 milljarðar íslenskra króna.

Verkís mun hanna og vinna útboðsgögn fyrir rafvæðingu Tangabryggju í Akureyrarhöfn og vinna þannig áfram að orkuskiptum hafnarinnar. Styrkveiting ríkisstjórnarinnar gerir það að verkum að hægt verður að setja upp háspennutengingu fyrir flutningaskip, rannsóknarskip og minni skemmtiferðaskip við Tangabryggju. Framkvæmdir eru þegar hafnar.

Mosfellsbær og Reitir vinna saman að undirbúningi deiliskipulags fyrir Blikastaði, nýjan atvinnukjarna í Mosfellbæ, sem skipulagður er með náttúru, sjálfbærni og samnýtingu að leiðarljósi. Verkís verkfræðistofa sér um verkfræðilega hönnun. 

Verkís hefur skilað sjálfbærniskýrslu vegna sáttmála SÞ um samfélagsábyrgð (e. UN Global Compact) fyrir árið 2019. Samhliða skilunum var undirsíða á heimasíðu okkar um sjálfbærni uppfærð.  

Svavar Jónatansson fæddist árið 1931 á Hólmavík á Ströndum. Sjálfur segist hann hafa komið í heiminn eins langt frá menningunni og menntuninni og mögulegt var á Íslandi en í þorpinu gat hann aðeins lokið fullnaðarprófi, þá fjórtán ára gamall. 

Svavar vissi það ekki þá en síðar átti hann eftir að ljúka prófi í byggingarverkfræði í Þýskalandi, stofna Almennu verkfræðistofuna ásamt fleirum og leggja grunninn að verkfræðistörfum á Keflavíkurflugvelli. 

Frá árinu 2018 hefur Verkís unnið að undirbúningi fyrirhugaðrar vatnsaflsvirkjunar í nágrenni við bæinn Akhalkalaki í Georgíu. Nú er Verkís að ganga frá samningi um næsta fasa verkefnisins; deilihönnun byggingarvirkja, hönnunarrýni á búnaði til virkjunarinnar ásamt samræmingu allrar hönnunar.

Til stendur að reisa nýtt úthverfi á Siorarsiorfik, ósnortnu svæði suðaustur af Nuuk á Grænlandi, til að mæta fólksfjölgun í höfuðborginni. Verkís vinnur þessa dagana ásamt samstarfsfólki sínu hjá S&M Verkís í Nuuk að hönnun ganga sem munu tengja hverfin saman. Verkís mun einnig vinna útboðsgögn. 

Ný dælustöð fyrir heitt vatn hefur tekið við af eldri dælustöð Selfossveitna á Selfossi. Nýja stöðin á að afkasta allt að 700 l/s en eldri stöðin afkastaði aðeins 250 l/s. Þörf var á auknum afköstum vegna mikillar fólksfjölgunar á Árborgarsvæðinu.

Rúmlega fjögur þúsund snjallmælar fyrir hitaveitu verða settir upp í íbúðarhúsum á Selfossi, Eyrarbakka og Stokkseyri á næstunni. Samið var við fyrirtækið Set hf. um afhendingu mælanna fyrir Selfossveitur og sá Verkís um hönnun og útboð á mælakerfinu.

Á föstudaginn úthlutaði umhverfis- og auðlindaráðherra tíu styrkjum til rafvæðingar hafna víðs vegar um landið, samtals 210 milljónum. Verkefnið er hluti af fjárfestingaátaki ríkisstjórnarinnar vegna Covid-19 heimsfaraldursins. 

Frummatsskýrsla um fyrirhugað sjókvíaeldi Arnarlax í Ísafjarðardjúpi og áhrif þess hefur verið auglýst af Skipulagsstofnun til kynningar. Verkís hefur unnið að mati á umhverfisáhrifum sjókvíaeldisins.

Frummatsskýrsla vegna endurbóta á kísilverksmiðju Stakksbergs í Helguvík hefur verið auglýst af Skipulagsstofnun til kynningar. Verkís hefur unnið að mati á umhverfisáhrifum vegna endurbótanna.