16/9/2021

Sumarstarfsfólkið okkar kvatt

Nú er komið að því að kveðja allt flotta sumarstarfsfólkið okkar, en í ár voru tuttugu og fimm sumarstarfsmenn hjá Verkís, fjórtán konur og ellefu karlar. Þau sinntu fjölbreyttum verkefnum og erum við mjög ánægð með að hafa fengið að njóta starfskrafta þeirra í sumar.

Þau Björn Freyr Gíslason, Davíð Gunnarsson, Eiríkur Ingi Jónsson, Magdalena Guðrún Bryndísardóttir og Silja Björk Axelsdóttir gefa okkur innsýn í störf þeirra í sumar en öll munu þau starfa áfram hjá Verkís í vetur.

Bjorn_freyr_gislason_svhv_h3-Björn Freyr Gíslason, B.Sc. í umhverfis- og byggingarverkfræði, var starfsmaður í framkvæmda og eftirlitshópi á Byggingasviði og aðstoðaði við eftirlit með nýbyggingu Alþingis ásamt umsjón og eftirliti með Helgafellslandinu í Mosfellsbæ. 

„Það sem stóð upp úr var eftirlitsstarfið á Alþingi. Byggingin er skemmtilega hönnuð með háum veggjum, mikið af sjónsteypu og stórum bitum sem gerir bygginguna krefjandi og einstaklega áhugaverða.“

„Mitt hlutverk var að sinna eftirliti sem felur í sér að gæta hagsmuna verkkaupa. Þau verkefni sem því fylgja eru meðal annars úttektir, magntökur, samskipti við verktaka, verkkaupa og hönnuði, efnissamþykktir og fundagerðir ásamt fleiru. Þetta sumar hefur verið lærdómsríkt og eflt mig í starfi og gefið mér betri sýn á framgang mála í stærri verkum.“

David_gunnarsson_verkis_h3_svhvDavíð Gunnarsson, B.Sc. í umhverfis- og byggingarverkfræði, aðstoðaði í verkefnum á sviði innviða við hönnun flugvalla, gatna og vega á Samgöngu- og umhverfissviði. Hann kom að margvíslegum verkefnum í sumar tengd samgöngum og umhverfisskipulagi.

„Ég hef mest verið að vinna í Civil 3D við að setja upp teikningar og aðstoða við hönnun á flugbrautum, landlíkönum og veglínum.“

„Það er kannski ekki eitthvað eitt verkefni sem að stendur upp úr, allt hefur þetta verið mjög lærdómsríkt og skemmtilegt. Það sem hefur hins vegar staðið upp úr er starfsandinn hérna og það hversu vel er tekið á móti nýjum starfsmönnum.“

Eirikur_jonsson_verkis_svhv_h3Eiríkur Ingi Jónsson meistaranemi í raforkuverkfræði var starfsmaður á Starfsstöðvasviði á Egilsstöðum en í lok sumars flutti hann yfir í rafbúnaðarhóp á Orku- og iðnaðarsviði með aðsetur á Akureyri. Eiríkur Ingi sinnti ýmsum tilfallandi verkefnum í sumar.
„Flest verkefnin sem ég vann í sumar sneru að álags- og ljósbogagreiningu á ýmsum kerfum, svo sem dreifistöðvum á Akureyri og Lögbergslínu, þar sem ég teiknaði upp kerfin í forriti sem heitir Paladin DesignBase og framkvæmdi greiningar í sama forriti.“

Það verkefni sem stóð upp úr að hans mati var vatnamælingar í kringum Egilsstaði þar sem hann aðstoðaði við uppsetningu á mælitækjum og fékk í leiðinni að njóta veðurblíðunnar fyrir austan í sumar.

Magdalena_bryndisardottir_verkis_h3_svhvMagdalena Guðrún Bryndísardóttir, B.Sc. í umhverfis- og byggingarverkfræði, aðstoðaði við burðarvirkjahönnun í margvíslegum verkefnum í burðarvirkjahópi á Byggingasviði. Fyrri hluta sumars aðstoðaði hún við hönnun á íþróttahúsi og sundlaug fyrir Stapaskóla í Njarðvík og seinni hluta sumars aðstoðaði hún við hönnun á Katrínartúni sem er tíu hæða skrifstofubygging við Höfðatorg.

„Ég vann mikið í Revit í sumar og lærði mjög vel á það forrit.“

Silja_bjork_axelsdottir_verkis_svhv_h3Silja Björk Axelsdóttir, B.Sc. í hátækniverkfræði, aðstoðaði við gerð stjórnkerfa fyrir hitaveitur á Orku- og iðnaðarsviði. Hennar helsta verkefni í sumar var að taka þátt í að endurnýja stjórnkerfi Hitaveitu Stykkishólms.

„Hlutverk mitt í verkefninu var að hanna skjámynd fyrir kerfið ásamt því að fá að taka þátt í forritun stýrivélarinnar. Það sem stóð upp úr var að fá að fara á mismunandi verkstaði og taka þátt í prófunum á merkjum skjámynda og stýrivéla.“
„Verkefnin sem ég vann við í sumar voru bæði fjölbreytt og skemmtileg.“


Frétt Verkís:
Sumarstarfsfólk Verkís 2021