Leikskóli - Álfaborg
Verkís sá um verkfræðihönnun og ráðgjöf vegna verkfræðiþátta.
| Stærðir: 560 m2 |
| Verktími: 2018 - 2019 |
Almennt um verkefnið:
Leikskólinn Álfaborg er staðsettur í Reykholti í Biskupstungum við hlið íþróttamiðstöðvar, sundlaugar og grunnskólans á svæðinu. Leikskólinn er grundaður á fyllingu og samanstendur burðarvirki byggingarinnar af steyptum sökklum og steyptum út- og innveggjum, en þakvirkið er gert úr stálbitum og léttu timburvirki. Byggingin er upphituð með gólfgeisla og eru öll rými loftræst með vélrænni loftræsingu.
Sérstakt tillit ertekið til hljóðvistar og er sérvalin innanhúsklæðning á veggjum og hljóðdúkur í lofti sem tryggir bæði góða hljóðvist og uppfyllir skilyrði brunahönnunar. Byggingin er klædd að utan með bárujárni á bæði veggjum og þaki, en innskot eru klædd með timbri.
Við hönnun á byggingunni gáfust bæði verkkaupa og meðhönnuðum kostur á því að kynna sér mannvirkið í sýndarveruleika (VR) í höfuðstöðvum Verkís í Ofanleiti í Reykjavík. Gaf það góða raun og nýttist vel við að yfirfara útlit og hönnun.
Byggingin skiptist í þrjár deildir, 1-2 ára deild, 2-3 ára deild og 4-5 ára deild. Á milli deilda eru tvö hóprými og hvíldarherbergi. Þá er stórt fatahengi í anddyri og matsalur fyrir starfsfólk og nemendur.
Í byggingunni eru einnig kaffistofa og vinnuherbergi kennara, sérkennslurými, listasmiðja, myrkvaherbergi, aðstaða leikskólastjóra ásamt ýmsum tæknirýmum. Lóð leikskólans er um 1.500 m² að stærð og er henni skipt upp í leiksvæði fyrir yngri deildir og leiksvæði fyrir eldri deildir. Á lóð er einnig leiktækjageymsla og geymsla fyrir barnavagna.
Leikskólinn var vígður föstudaginn 18. október 2019.
Ljósmynd/Sæland photos
