Verkefni

Endurbygging vesturhúss OR

Verkís annaðist alla verkfræðihönnun við endurbyggingu hluta skrifstofuhúsnæðis Orkuveitu Reykjavíkur að Bæjarhálsi 1

Yfirlit verkefnis

Endurbyggja þurfti hluta Vesturhússins eftir að í ljós kom árið 2017 að húsið hafði orðið fyrir umfangsmiklum rakaskemmdum. Við endurbygginguna var húsið jafnframt aðlagað að breyttri notkun og nýjum þörfum starfseminnar.

Á 1. hæð hússins var komið fyrir blönduðu rými fyrir fundarherbergi, kaffiaðstöðu og vinnustöðvar. Breytt nýting rýmisins kallaði á breytingar á innra skipulagi og tæknikerfum, meðal annars raflögnum, lýsingu, loftræsingu, stjórnkerfum og fjarskiptum.

Verkís kom að verkefninu með þverfaglega verkfræðihönnun og ráðgjöf á sviði rafkerfa, stjórnkerfa, lagna, loftræsingar, lýsingar, hljóðvistar, bruna- og öryggiskerfa og hljóð- og myndkerfa.

Við endurbyggingu hússins var byggt á núverandi burðarkerfi og lögð áhersla á viðurkenndar lausnir, hagkvæmni í byggingu og rekstri og sveigjanleg og heilsusamleg innanrými.

Áskorunin

Verkefnið fól í sér endurbyggingu og breytta nýtingu núverandi húsnæðis þar sem taka þurfti tillit til núverandi byggingar og burðarkerfis. Jafnframt þurfti að samræma fjölmörg tæknikerfi við nýja rýmisskipan og ólíka notkun rýma. Á 1. hæð þurfti sérstaklega að taka mið af mismunandi þörfum vinnustöðva, fundarherbergja og sameiginlegra rýma. Breytt notkun kallaði meðal annars á skoðun á hljóðvist innan rýma og milli þeirra.

Lausnin okkar

Verkís annaðist alla verkfræðihönnun verkefnisins og samþættingu ólíkra tæknikerfa. Unnið var að hönnun raflagna- og smáspennukerfa, lýsingar, stjórnkerfa, lagna og loftræsingar auk bruna- og öryggiskerfa og fjarskipta. KNX-stjórnkerfi var hannað og forritað til að styðja við stjórnun og samræmingu tæknikerfa. Einnig voru hönnuð hljóð- og myndkerfi fyrir fundarsali og veitt ráðgjöf um hljóðvist. Hönnun lagnakerfa og annarra tæknikerfa var unnin í Revit í þrívídd, sem studdi við samræmingu hönnunar og yfirsýn yfir kerfin.

Niðurstaðan

Með endurbyggingunni var húsnæðið aðlagað að breyttri starfsemi og nýjum þörfum notenda. Á 1. hæð var komið fyrir fjölbreyttri vinnu- og fundaraðstöðu þar sem áhersla var lögð á sveigjanleika, gott vinnuumhverfi og samþættingu tæknikerfa. Verkís kom að verkefninu frá hönnun og útboðsundirbúningi til aðstoðar og eftirlits á verktíma og tryggði samræmingu þeirra fjölmörgu tæknikerfa sem verkefnið tók til.

Verkefnið í hnotskurn

Staðsetning:

Bæjarháls, Reykjavík

Verktími:

2019 – 2023

Þjónusta Verkís

Hafa samband

Skoðaðu verkefnin okkar

Kynntu þér hvernig við höfum aðstoðað viðskiptavini við að leysa flóknar tæknilegar, umhverfislegar og rekstrartengdar áskoranir með nýstárlegum verkfræðilausnum og stefnumótandi ráðgjöf á fjölbreyttum mörkuðum.