Flugvellir

Flugstöð Leifs Eiríkssonar

Keflavíkurflugvöllur

  • FLE

Verkís annast verkefnastjórn, hönnunarstjórn, forathugun, frum- og fullnaðarhönnun, framkvæmdaáætlun, útboðsgögn, yfirferð tilboða, framkvæmdaeftirlit, jarðvinnu, burðarvirki, lagnakerfi, loftræsingu, hitakerfi, vatns- og hreinlætiskerfi, snjóbræðslu- og vatnsúðakerfi, brunatæknilega hönnun, lóðarhönnun og ráðgjöf vegna breytinga á flugvélastæðum.

 Stærðir: 40.500 m2 og 160.000 m3
 Verktími:  1985 - 

Almennt um verkefnið:
Verkís hefur frá upphafi unnið við hönnun á Flugstöð Leifs Eiríkssonar en norðurbyggingin var vígð í apríl 1987. Flugstöðin var stækkuð með suðurbyggingu sem tekin var í notkun árið 2001. Árið 2004 var ráðist í að stækka norðurbygginguna og voru innritunar- og móttökusalir stækkaðir til vesturs og austurs og þaki hússins lyft og útbúnar skrifstofur á þriðju hæðinni þar sem áður voru aðeins tæknirými.

Norðurbyggingin er á þremur hæðum auk lagna- og tækjakjallara en á svæðinu er einnig um 37.500 m2 snjóbræðsla. Suðurbyggingin er á tveimur hæðum auk kjallara sem er undir meginhluta hússins og lagnakjallari þar fyrir utan. Farið var í stækkun til vestur á suðurbyggingunni árið 2013. 

Árið 2016 var farið í stækkun norðurbyggingar til vesturs, ásamt viðbyggingu norðurbyggingar til suðausturs. Í heild eru viðbyggingarnar um
4.300 m2. Í vesturstækkuninni verður ný vörumóttaka fyrir flugstöðina, starfsmannahlið, stækkun á farangursflokkunarsal, nýtt aðkomuhlið fyrir flugvallarsvæði ásamt geymslum og skrifstofurýmum. Austurstækkunin verður byggð ofan á flughlaðið en þar verður nýtt færibandakerfi fyrir komufarþega. Verkefnið felur einnig í sér niðurrif á núverandi vörumóttöku. Viðbyggingarnar eru stálgrindarhús klædd með yleiningum. Þar sem viðbyggingarnar eru reistar utan um færibandakerfi þarf að taka tillit til þeirra við hönnun á byggingum og tæknikerfum. 

Stækkun flugstöðvarinnar var unnin samkvæmt BIM aðferðarfræðinni.

Verkís hefur unnið að öllum helstu þáttum við alla byggingaráfanga flugstöðvarinnar. En eðli flugstöðvarbyggingar er að hún er í stöðugri þróun og því hefur verið nauðsynlegt að hanna öll kerfi hússins með slíkan sveigjanleika í huga.