Frettir > Verkís á Lagarlíf 2025

Verkís á Lagarlíf 2025

Sjálfbærni, nýsköpun og framtíð fiskeldis í brennidepli

Verkís tók þátt í Lagarlíf ráðstefnunni 2025, sem fór fram í Hörpu dagana 30. september og 1. október. Lagarlíf er stærsta ráðstefna sinnar tegundar á Íslandi og hefur vaxið jafnt og þétt frá upphafi árið 2017. Gestir á ráðstefnunni voru yfir 750 talsins.

Verkís með bás á sýningarsvæðinu

Fulltrúar Verkís voru með bás á sýningarsvæðinu þar sem kynnt var þjónusta og fyrrum verkefni Verkís með áherslu á fiskeldi. Verkís hefur áralanga reynslu á þessu sviði og starfar með fjölmörgum aðilum að þróun og innleiðingu umhverfisvænna lausna í sjávarútvegi og fiskeldi.

Fjölbreytt dagskrá og áhugaverð erindi

Ráðstefnuáherslur í ár voru meðal annars áskoranir í lagareldi, ímynd og samfélagsleg ábyrgð sjókvíaeldis, líffræði og örverur, nýting gervigreindar, dýravelferð, umhverfismál og sjálfbærni.

Fjölmargir innlendir og erlendir sérfræðingar fluttu erindi á ráðstefnunni, meðal annars:

• Gervigreind, lykill að framtíð lagareldis – Dag Sletmo, DNB
• Hvers virði er orðspor? Samfélagslegt samstarf skapar tækifæri til framtíðar – Íris Róbertsdóttir, bæjarstjóri í Vestmannaeyjum
• Sjálfbær nýsköpun og náið samstarf – tilgangur okkar að fæða framtíðina – Mads Martinsen, Skretting Norway

Mikilvægur vettvangur fyrir greiningu og samvinnu

Lagarlíf stuðlar að faglegri og fræðandi umræðu um strandbúnað og fiskeldi. Markmið ráðstefnunnar er að efla samskipti, menntun, rannsóknir og stefnumótun innan greinarinnar.

Að baki ráðstefnunni stendur félagið Strandbúnaður ehf., sjálfseignar- og óháð félag sem er ekki tengt neinum einum hagsmunaaðila. Félagið var stofnað af 23 fyrirtækjum og stofnunum í greininni og starfar án hagnaðarsjónarmiða.

Ráðstefnan er mikilvæg til að fræðast um helstu áherslur hér á landi og erlendis, en einnig að kynna þjónustu og reynslu Verkís.

Vaxandi áhugi og þátttaka

Ráðstefnan hefur vaxið jafnt og þétt frá því fyrsta Lagarlíf var haldið árið 2017 með 260 þátttakendum. Árið 2025 sóttu um 750 gestir viðburðinn í Hörpu, þar á meðal fulltrúar frá fisk- og skelrækt, vinnslu, þjónustu, rannsóknum og stjórnsýslu.

Lagarlíf hefur þannig fest sig í sessi sem einn mikilvægasti vettvangur fagumræðu og nýsköpunar í íslenskum sjávarútvegi.

Nánari upplýsingar um ráðstefnuna má finna á lagarlif.is.

Heimsmarkmið