Frettir > Verkís kemur að hönnun nýrrar menningar- og safnamiðstöðvar í Skagafirði

Verkís kemur að hönnun nýrrar menningar- og safnamiðstöðvar í Skagafirði

Nýtt menningarhús á Sauðárkróki verður sameiginlegur vettvangur lista, fræða og samfélags

Samningur undirritaður um hönnun nýs menningarhúss

Samningur um hönnun nýrrar menningar- og safnamiðstöðvar í Skagafirði var undirritaður nýverið af Sigfúsi Inga Sigfússyni, sveitarstjóra Skagafjarðar, og Þorvarði Lárusi Björgvinssyni, framkvæmdastjóra Arkís arkitekta.

Verkís tekur þátt í verkefninu sem undirráðgjafi Arkís og mun sinna verkfræðiþjónustu á sviði burðarvirkja, lagnakerfa og loftræstingar, rafkerfa og lýsingar, brunatækni og hljóðvistar.

Lifandi miðstöð menningar og fræða

Markmið verkefnisins er að skapa lifandi og aðlaðandi menningarhús á Sauðárkróki sem verði miðstöð fjölbreyttrar menningarstarfsemi í Skagafirði.

Í húsinu mun verða að finna sýningarsali, bókasafn, listasafn, byggðasafn og skjalasafn, auk fjölnota salar sem nýtist fyrir myndlistarsýningar, sviðslistir og aðra menningarviðburði. Þar verða jafnframt viðurkennd varðveislurými sem uppfylla kröfur ríkisins um aðbúnað opinberra safna.

Sterkt teymi að verki

Verkefnið er unnið í framhaldi af hönnunarsamkeppni þar sem Arkís arkitektar hlutu fyrstu verðlaun.
Í hönnunarteyminu eru auk Verkís fyrirtækin Landhönnun slf. og Brekke & Strand Akustikk ehf.

Við hönnun verkefnisins er lögð áhersla á hagkvæmni, gæði og umhverfislega ábyrgð, með hönnun sem fellur vel að landslagi Flæðanna á Sauðárkróki.

Byggingin tekin í notkun árið 2027

Gert er ráð fyrir að nýja menningarhúsið verði tekið í notkun fyrir árslok 2027.
Verkís leggur sitt af mörkum til að tryggja að húsið verði bæði fagurfræðilega heillandi og tæknilega framsækið, með áherslu á góða hljóðvist, orkunýtingu og góða upplifun fyrir bæði gesti og starfsfólk.

Heimsmarkmið